APR HC yafashe umwanya wa umwanya wa mbere ku rutonde rwa Shampiyona y'icyiciro cya mbere muri Handball, ni nyuma yo gutsinda Police HC ibitego 30-26.
Wari umukino w'ishiraniro kuri aya makipe y'amakeba aho buri kipe itashakaga gutakaza, cyane ko Police HC yari imbere inafite icyizere kuko yari yaranayitsinze mu mwaka ushize ku mukino wa nyuma iyitwara igikombe cya Shampiyona.
Abasore b'umutoza Bagirishya Anaclet, bazanye umujinya ukomeye bashaka kwihorera, kuko ntibari kwemera gusubirwa.
Igice cya mbere cy'umukino, abasore ba b'umutoza Ntabanganyimana Antoine binjiye mu mukino neza ndetse baza no gushyiramo ikinyuranyo cy'ibitego bitanu.
Gusa APR HC ibifashijwemo n'abarimo Ndayishimiye Jean Pierre wagize umukino mwiza na Julius Chiunda baje gukuramo ibi bitego baza kujya kuruhuka bayoboye n'ibitego 15-14.
Bagirishya Anaclet wari warahiriye gutsinda uyu mukino, mu gice cya kabiri yashyize igitutu ku basore be maze bashyuhana Police HC aho abakinnyi bayo ngenderwaho nka Kubwimana Emmy, Mbesutunguwe Samuel na Yves umukino wabagowe, byatumye APR HC iwutsinda ku bitego 30-26.
APR HC ikaba yahise isoza imikino ya Shampiyona isanzwe (regular season) iyoboye n'amanota 26 inganya na Police HC ariko ikayirusha ibitego izigamye aho izigamye 102, Police HC izigamye 64.
Nyuma y'irushanwa ryo Kwibuka rizaba mu mpera z'iki cyumweru, hazatangira imikino ya Kamarampaka (playoffs) aho APR HC ya mbere ku rutonde izahura na GS Tabagwe ya kane n'aho Police HC ya kabiri ihure na Gicumbi HT ya gatatu.
Source : http://isimbi.rw/apr-hc-yatsinze-police-hc-ifata-umwanya-wa-mbere-amafoto.html
