RSSB Tigers BBC yatunguye Petro de Luanda iyitsinda amanota 82-78 mu mikino y'ijonjora rya BAL irimo kubera muri Afurika y'Epfo i Pretoria.
Ni imikino yo mu itsinda rya Kalahari Conference aho Tigers BBC ihagarariye u Rwanda yarimo ikina umukino wa kabiri na Petro de Luanda yabaye iya kabiri umwaka ushize.
Nyuma yo gutsinda Al Hilal Benghazi, Tigers BBC uyu munsi yagomba kwisobanura na Petro de Luanda kuri iki Cyumweru tariki ya 29 Werurwe 2026.
Ntabwo RSSB Tigers BBC yahiriwe n'agace ka mbere kuko Petro de Luanda yagatsinze amanota 17-12.
Abarimo Ntore Habimana, Leonard Craig Randall baje mu gace ka kabiri bariye amavubi maze batsindira Tigers BBC amanota menshi maze aka gace bagatsinda 22-19.
Bivuze ko bagiye kuruhuka Tigers yagabanyije ikinyuranyo hasigayemo amanota abiri aho byari 36-34.
Mu gace ka gatatu Tigers yafatiyeho maze igatsinda amanota 23-20.
Abakinnyi nka Leonard Craig Randall na Teafale Lenard Jr bafashije Tigers kuzamura ikinyuranyo aho cyageze ku manota 10 (72-62) gusa Petro de Luanda yagerageje kugabanya ikinyuranyo gusa umukino urangira hasigayemo amanota 4, umukino warangiye ari 82-78.
Tigers izagaruka ikina na Johannesburg Giants yo muri Afurika y'Epfo tariki ya 1 Mata 2026.
Source : http://isimbi.rw/tigers-bbc-yahangamuye-igihangange-muri-afurika.html
